← Volver ao xogo

Privacidade

Última actualización: 8 de novembro de 2026

Orbit Panic xógase sen conta, non ten publicidade e non vende nin cede datos a ninguén. Esta páxina conta que se garda, onde e por que, tanto na web coma na aplicación para móbiles.

Quen responde dos teus datos

O responsable do tratamento é Xose de la Paz. Para calquera cousa relacionada cos teus datos, escribe a xose@novadream.com.

O que segue describe todo o que Orbit Panic fai con eles. Non hai máis.

O que queda no teu dispositivo

Non hai contas nin rexistro. A túa mellor marca, as túas iniciais, o idioma, o son e o modo de disparo gárdanse só no almacenamento local do navegador ou da aplicación, e non se envían a ningún servidor. Bórranse ao borrar os datos do sitio no navegador ou os da aplicación nos axustes do teléfono.

A táboa de récords

Cando unha partida entra na táboa de récords, o xogo pídeche tres iniciais e envía ao servidor esas tres letras ou cifras, a puntuación e o nivel alcanzado; o servidor anota a data. Nada máis: nin o teu nome, nin o teu enderezo IP, nin ningún identificador do teu dispositivo.

A táboa é pública e común á web e á aplicación: vea calquera que xogue. A base xurídica é o interese lexítimo en manter unha táboa de récords compartida (artigo 6.1.f do RXPD). Unhas iniciais rara vez identifican a ninguén, e podes poñer as que queiras; se aínda así queres que se borre unha marca túa, escribe a xose@novadream.com dicindo cal é.

Se a partida é a dous, a marca vai a unha táboa á parte, de dous xogadores, coas iniciais dos dous. As de quen entrou na sala viaxan polo servidor de salas ata o dispositivo de quen a creou, que é o que envía a marca, e véas o compañeiro de partida.

Xogar a dous

Para xogar a dous, unha persoa crea unha sala e a outra entra co seu código. Mentres dura a partida, os dous dispositivos conéctanse co servidor de salas de PNYK (salas.pnyk.es), no mesmo provedor de aloxamento en España, e todo o que se din pasa por el: a outra persoa non ve o teu enderezo IP.

O servidor usa o enderezo IP mentres estás conectado, para manter a conexión e limitar os intentos e as salas por persoa, e non o garda en disco nin en rexistros propios. O código da sala só existe na súa memoria e bórrase ao acabar a partida ou aos dez minutos sen ninguén. O que se envían os dous xogadores é a propia partida —posicións, disparos, pausas e iniciais— e non se garda, agás a marca se entra na táboa de récords. A base xurídica é o interese lexítimo en ofrecer o xogo a dous que pides ao crear unha sala ou entrar nela (artigo 6.1.f do RXPD).

Medición de uso na web (Google Analytics)

A web orbit.pnyk.es usa Google Analytics 4, un servizo de Google Ireland Limited, para saber canta xente xoga, desde onde chega e en que idioma. Google recibe datos técnicos do teu navegador e da túa visita —páxinas vistas, enderezo IP, tipo de dispositivo e idioma— e deixa as cookies que se detallan máis abaixo para distinguir unha visita da seguinte.

Google pode transferir eses datos aos Estados Unidos ao abeiro do Marco de Privacidade de Datos UE-EUA. Os detalles están na política de privacidade de Google, en policies.google.com/privacy. Podes impedir a medición bloqueando as cookies de terceiros ou cun bloqueador no navegador: o xogo funciona exactamente igual.

A aplicación para móbiles

A aplicación de Orbit Panic é o mesmo xogo ca web, empaquetado. Non leva Google Analytics nin ningunha outra medición, non mostra publicidade, non ten compras e non pide máis permiso que o acceso a internet, que usa só para a táboa de récords e para xogar a dous. Sen conexión funciona enteira, agás o xogo a dous.

Cookies e almacenamento local

Orbit Panic non usa ningunha cookie propia. O que garda no teu dispositivo é isto:

NomeDe quenPara queCanto dura
orbitpanic_bestOrbit Panic (almacenamento local)A túa mellor puntuación e o nivel ao que chegachesAta que o borres
orbitpanic_scores, orbitpanic_scores2Orbit Panic (almacenamento local)Unha copia das táboas de récords, de un e de dous xogadores, para velas sen conexiónAta que o borres
orbitpanic_initialsOrbit Panic (almacenamento local)As últimas iniciais que escribichesAta que o borres
orbitpanic_lang, orbitpanic_muted, orbitpanic_autofireOrbit Panic (almacenamento local)Os teus axustes: idioma, son e modo de disparoAta que o borres
_gaGoogle Analytics (cookie, só na web)Distinguir un visitante doutroDous anos
_ga_*Google Analytics (cookie, só na web)Manter a sesión de mediciónDous anos

Na web, o navegador garda ademais unha copia do xogo para que funcione sen conexión. Non contén ningún dato persoal.

O servidor

Coma calquera servidor web, os que aloxan orbit.pnyk.es e salas.pnyk.es levan un rexistro técnico de accesos —enderezo IP, enderezo pedido e data— durante un tempo limitado, para a súa seguridade e o seu bo funcionamento. A base xurídica é o interese lexítimo en protexer o servizo (artigo 6.1.f do RXPD).

Canto tempo se conserva

As marcas da táboa de récords consérvanse mentres exista o xogo, agás que pidas que se borre a túa. O que hai no teu dispositivo, ata que o borres. As cookies de Google Analytics caducan aos dous anos. O código dunha sala e a conexión co servidor de salas, ata que acaba a partida.

Os teus dereitos

Podes acceder aos teus datos, rectificalos, pedir que se borren, limitar ou opoñerte ao seu tratamento e levalos contigo escribindo a xose@novadream.com.

Se cres que a túa petición non se atendeu ben, podes reclamar ante a Axencia Española de Protección de Datos (www.aepd.es).

Menores

Orbit Panic non pide a idade nin ningún dato que permita coñecela, e o único que sae do dispositivo son tres iniciais e unha puntuación e, se xogas a dous, a propia partida, que non se garda.

Onde se garda

A táboa de récords gárdase no servidor que aloxa orbit.pnyk.es, nun provedor de aloxamento en España. Os datos da medición, nos servidores de Google. O servidor de salas, no mesmo provedor, non garda nada da partida.

Cambios

Se esta política cambia, cambiará a data do principio. Esta páxina é sempre a versión vixente.